《奇跡》
最近有讀者pm我，有位嶺大既師妹犖晴佢併發罕見肺病急需器官移植，細佬一直以來都有好多人支持同埋比意見同分享我，我亦希望犖晴佢可以得到幫忙，令佢家人可以放下心頭大石。
自從面對過親人離別等等事之後，我定期都會去捐血，因為我知道手術入面每一滴血都係來得有名有姓，即使當時有好多人推話唔好捐血，怕血液落到大陸人身上都好，我都覺得總有日血會用係有需要既人身上。
而器官捐贈都係一樣，我好早已經登記左器官捐贈名冊，早幾日我爸爸突然打電話比我，我以為細佬有乜特別事，佢好突然咁講，如果醫護話想細佬登記器官捐贈的話，佢一定唔會同意。
當時我呆左一呆，然後話ok，首先我知道醫護係唔會係呢個情況之下講呢件事，因為對家人來說係一種傷痛同打擊，其次我想講，我好耐之前已經見過細佬佢張器官捐贈卡。
對於老一輩既人講，捐贈係一種忌諱，我明白，但將心比己去睇，如果有日係你需要人幫忙，你又會唔會將心比己咁去覺得人地唔捐係好事？
睇返網上資料，實行自願捐贈的國家中，美國為27，澳洲為16.1，而香港只係5.8，僅僅比中國2.98為高。
西方國家有採取「預設默許捐贈」制度，即係每個人都會係捐贈者，除非你聲明話唔會捐，咁佢就會將你係名冊入面抽出黎，但其實亦分「硬性」同「軟性」，軟性即係就算你無取消捐贈都好，你家屬都有權最終決定唔捐，而硬性就係你無取消的話，家屬唔同意都會捐出。
以2018年資料睇，香港有32.5%人願意捐，但最終登記的只有3.78%，因為好多人覺得無急切性就無去登記，如果轉為預設捐贈的話，應該可以大大提升捐贈比例。
香港只有腦死亡的人先可以捐贈出去，所以每年有4萬人過身都不足100人腦幹死亡，最終捐贈到既數目就更少，作為家屬，真係需要等待奇跡出現先可以得救……
華人普遍都迴避生死問題，好多人都會有不同程度既避諱，或者係2020年今日，大家需要調整一下心態，思考一下有日係你自己等待一個奇跡會點。
奇跡呢個字眼，我唔太喜歡，因為奇跡只可以默默等待，大家都知奇跡出現機會係有幾多，如果大家都可以登記返，有日等待器官捐贈已經唔再係奇跡，而係一種互相幫助既行為，相信會幫到太多太多受病痛折磨的家庭。
附上捐贈登記連結：https://www.codr.gov.hk/codr/CInternetAgreeRegistration.jsf
Search